Екипата на Борец за пролетниот дел на Втората фудбалска лига ќе биде посилна за Един Мерсовски, Дамјан Зенговски и Алекс Митров.
Со овие три играчи тимот на Горан Симов добива на квалитет во борбата за опстанок во второлигашкото друштво.
Мерсовски носи прволигашко искуство во тимот на Борец, каде всушност е повратник, а 30-годишникот низ својата кариера беше дел од Кораб, Гостивар, Хоризонт Турново, Кожуф, Работнички, Металург и Вардар.
Младиот Зенговски кој има 19 години доаѓа од второлигашот Вардарски, а игра на позицијата десен бек. Митров, исто така има 19 години, доаѓа од италијанскиот тим Триестина, а потекнува од школата на Јанг Бојс, додека пак во Македонија уште настапуваше и за Беласица.
Во рамки на првото пролетно коло кое се игра веќе во сабота Борец ќе гостува кај Башкими. Екипата на Борец е на претпоследното место со пет бодови на своето конто односно во зоната за директно испаѓање во Трета лига, па тимот има една цел – сигурен и директен опстанок во Втората лига.
