Овој викенд започна Суперлигата во женска конкуренција со мечевите од третото коло на плеј-офот, додека пак плеј-аутот ќе стартува подоцна.
Шампионот Ѓорче Петров воопшто не виде мака против Вардар и во доминатен меч го совлада со 20:36, по катастрофално прво полувреме на „вардарки“ кои постигнаа само седум погодоци. Ивана Дежиќ беше најдобар стрелец со девет гола кај „лавиците“, додека пак кај Вардар најдобра беше Леона Миленковска, исто така со девет реализации.
Астибо не можеше да го запре фаворитот Чаир кој во Штип триумфираше со високи 24:39 и победничките се враќа дома. Ниту десетте погодоци на искусната голгетерка Марија Анчева не беа доволни за штипскиот тим да направи изненадување против фаворитот, додека пак кај Чаир најмногу се истакна Стефанија Ѓеоргиевска со осум гола.
Металург Автокоманда го совлада Куманово на гостински терен со 18:22. Во првиот дел резултатот беше 11:14 за тимот од Автокоманда, но во вториот дел беа постигнати многу малку погодоци или 7:8 за вторите 30 минути.
Сузана Зечевиќ беше најдобра кај Куманово со девет погодоци, а пак кај Металург Автокоманда се истакна Марија Јанкуловска со шест гола.
