Ракометниот клуб Текстилец за новата сезона го претстави Бобан Попов како нов играч, а ппвратникот во својот матичен клуб ќе ги води и младите категории.
Попов со свое долгогодишно искуство и постигнувања во Македонија и европските лиги, претставува големо засилување за штипскиот прволигаш, повеќе од јасно е дека со своето искуство Попов ќе донесе свежина и квалитет кај Текстилец.
Попов во својата кариера како играч освои титули во сите категории од пионери до сениори во Македонија, сега ќе работи на развој на младите ракометари на Текстилец.
“Неговиот пристап ќе се фокусира на унапредување на моторичките способности, физичката и техничката подготвеност, како и на психолошката стабилност и тимскиот дух на младите играчи. Со своето искуство стекнато во Португалија, Холандија и Германија, Попов ќе внесе нови методи и иновации во тренерската практика на клубот. Неговата цел е да создаде силни и конкурентни тимови преку интегрирање на современи тренерски техники и фокусирање на целосниот развој на играчите”, велат од РК Текстилец.
Текстилец во новата сезона во Првата лига ќе настапува во групата Б со екипите на Вардар Неготино, Скопје, Младост од Богданци, Шампион Македонија Ѓорче Петров, Партизан од Гевгелија, Преспа Вардар од Ресен и екипата на Драчево.
Во рамки на 1. коло Текстилец ќе гостува во Неготино кај Вардар.
Александар Ванев, Спортска Мрежа
