Второлигашот Детонит Плачковица од Радовиш ги претстави првите зимски засилување за пролетниот дел. Станува збор за повратниците Филип Димоски и Јовица Радевски.
Двајцата играчи во минатото го носеа дресот на радовишкиот второлигаш и се враќаат во добро позната средина за нив.
25-годишниот Димоски во Радовиш доаѓа од редовите на Охрид, а во својата кариера покрај за Охрид и Детонит Плачковица има настапувано и за Победа, Каменица Саса, Пити Гули, Вардар Неготино, Осогово и 11-ти Октомври.
Радевски, кој има 24 години во Радовиш пристигна од Брегалница од Штип. Тој дресот на Детонит Плачковица го носеше во период од август 2022 година до јули 2023 година кога замина во Беса. Претходно, настапуваше и за Плачковица, па средината во Радовиш за Радевски е повеќе од Позната. Има настапувано и за Каменица Саса, Кадино, Македонија ЃП, Вардар, Работнички и Скопје.
Во следниот период според информациите на Спортска Мрежа во Детонит Плачковица треба да пристигат уште две до три засилувања.
Од радовишкиот клуб досега заминаа капитенот Иван Настевски, Тони Мирчевски и Дарко Стојанов кои во пакет го засилија третолигашот Слога Виница, Стефан Бабунски кој е нов играч на Брегалница од Штип и Анџело Николовски кој ќе биде нов играч на Македонија ЃП, а во следните денови ќе следува негова официјална промоција.
Детонит Плачковица предводен од штипскиот стратег Горан Здравков на 9. јануари ќе ги започне подготовките за пролетниот дел.
