Фудбалерот на штипска Брегалница, Давид Калпачки, успешно го заврши оперативниот зафат по тешката повреда со која се здоби кон крајот на август. Сега пред него следува период на рехабилитација и опоравување, по што се очекува неговото враќање на фудбалските терени.
Калпачки се повреди на еден од тренинзите на Брегалница кон крајот на месец август, кога заработи руптура, односно кинење на предните вкрстени лигаменти. Станува збор за сериозна повреда која бара оперативен третман и подолг процес на закрепнување пред повторно враќање на зелените терени.
Повредата дојде во незгоден момент за Калпачки, кој беше во одлична форма и се наметна како еден од најстандардните, најкорисните и најкреативните фудбалери во составот на штипските „сини“.
Неговото отсуство претставува значаен хендикеп за Брегалница, која остана без фудбалер со важна улога во организацијата на играта и офанзивните активности на екипата.
По успешно извршената операција, приоритет за Калпачки ќе биде целосното закрепнување, со постепено враќање на физичката подготвеност и тренажниот процес. Времетраењето на рехабилитацијата ќе зависи од текот на опоравувањето и проценките на медицинскиот тим.
Соиграчите, стручниот штаб и раководството на Брегалница му упатија желби за успешна рехабилитација на популарниот Калпа, со надеж дека повторно ќе го видат на фудбалските терени.
