Во просториите на Ракометната федерација на Македонија денеска се одржа состанок со ракометните судии од Скопје, на барање на генералниот секретар на РФМ, Влатко Тасевски.
Главен акцент на средбата беше ставен на реактивирањето и воспоставувањето функционален Скопски судиски збор, како важен чекор кон подобра организација и унапредување на работата на ракометните судии во главниот град.
На состанокот во фокус беа и подобрувањето на меѓусебната комуникација и координација, како и создавањето услови за континуиран професионален развој на судискиот кадар.
Преку ваквите активности, Ракометната федерација на Македонија настојува да придонесе кон поорганизирана и пофункционална судиска заедница, со поголема соработка и заеднички пристап кон предизвиците во македонскиот ракомет.
