РК Вардар влегува во новата сезона со промена во лидерската структура на тимот. „Црвено-црните“ одлучија капитенската лента да му ја доверат на голманот Васил Гогов, кој со години е дел од клубот.
Гогов е играч кој својата кариера ја градел во вардаровата средина, а долгогодишната посветеност кон клубот сега добива и официјална потврда преку една од најодговорните улоги во екипата. Како капитен, тој ќе треба да биде лидер на составот и на теренот и надвор од него, но и пример за останатите соиграчи.
За негов заменик е избран Јака Малус, искусниот словенечки ракометар кој е меѓу важните фигури во тимот и во новата сезона ќе има значајна улога во играта на Вардар.
Од клубот потенцираат дека капитенската лента носи голема чест, но и одговорност, верувајќи дека Гогов со својата посветеност и однос кон Вардар ќе ја оправда довербата.
„Капитенската лента е чест, но и обврска. Таа носи одговорност, карактер и пример за сите во соблекувалната“, порачаа од Вардар.
Со новото капитенско дуо, Вардар ја започнува сезоната со амбиции за нови предизвици и борба за трофеи.
