Вардар го остави зад себе лошиот период и во минатото коло стигна до важна победа над Силекс на домашен терен. Сепак, за актуелниот шампион нема многу време за одмор, бидејќи денеска го очекува нов предизвик.
„Црвено-црните“ гостуваат во Кавадарци, каде ќе ги одмерат силите со Тиквеш, тим против кој традиционално имаат позитивен биланс. Вардар ќе сака да ја продолжи победничката серија и со нови три бода да остане во чекор со конкурентите за врвот.
За избраниците на Вардар победата е императив, особено по стартот на сезоната во кој веќе загубија неколку важни бодови. Секое ново киксирање би можело дополнително да ја зголеми разликата во однос на конкурентите, уште во раната фаза од шампионатот.
„Работевме напорно изминативе денови и фокусирани сме на натпреварот со Тиквеш. Ова е многу важен меч за нас, затоа што по триумфот над Силекс сакаме да фатиме победнички ритам. Ќе сториме сѐ да ги освоиме трите бода во Кавадарци, иако знаеме дека Тиквеш игра квалитетно пред своите гледачи. Сепак, ние веруваме во нашите способности и одиме на победа“, порача Данев.
Натпреварот меѓу Тиквеш и Вардар е закажан за 17 часот и ќе се одигра на Градскиот стадион во Кавадарци. Главен судија на мечот е Александар Грујоски.
