Беласица со победа ги заврши подготовките за новата сезона во Втората македонска фудбалска лига, откако во последниот контролен натпревар славеше над Работнички со минимални 1-0. Одлични услови за фудбал на стадионот „Благој Истатов“ и пред солиден број на публика се одигра „генералката“ на овие два второлигаши.
Дуелот на стадионот „Благој Истатов“ во Струмица беше последна проверка за двата второлигаши пред стартот на шампионатот, закажан за 15 август. И двата тима имаа свои моменти и прилики за погодок, но само еднаш се тресеше мрежата.
Победничкиот гол за Беласица го постигна новото засилување Пепи Ѓорѓиев, кој во финишот од натпреварот ја обезбеди минималната победа за струмичани.
Сепак, резултатот беше во втор план за двата стручни штаба. Тренерите Мартин Алаѓозовски и Баже Јанекиевски имаа можност да ги проверат сите фудбалери, да дадат минутажа и на помладите играчи, како и на оние кои имаа помала минутажа во досегашниот тек на подготовките.
На овој начин, последната контрола понуди уште една можност стручните штабови да добијат слика за моменталната форма и за тоа што е сработено во изминатиот период.
Беласица сезоната во Втората лига ќе ја отвори на домашен терен против Осогово, додека Работнички ќе биде домаќин на Кожуф во првото коло.
Со ова, и двата тима го затворија подготвителниот период и сега целосно го насочуваат вниманието кон првенствените предизвици.
