Второлигашот Пелистер продолжува интензивно да го комплетира играчкиот кадар за новата сезона, а најново засилување на битолскиот клуб е искусниот Благојче Спиркоски, кој по пауза од пет години повторно ќе го носи зелено-белиот дрес.
Спиркоски се враќа во Битола по шестмесечниот престој во второлигашот Охрид и со своето богато искуство треба да биде едно од клучните имиња во тимот на Борче Христов, кој има јасна цел – експресно враќање на Пелистер во Првата македонска фудбалска лига.
Во својата кариера, Спиркоски настапуваше за повеќе македонски клубови. Беше дел од Хоризонт Турново, а потоа ги бранеше боите на Кожуф, Тиквеш, Гостивар, Шкупи, Македонија ЃП, Победа, Еуромилк, 11 Октомври, како и на Пелистер и Охрид, оставајќи белег каде и да настапуваше.
Во Битола веруваат дека неговото враќање ќе донесе дополнителна стабилност и квалитет во составот, а новиот стратег Борче Христов продолжува со формирањето на тимот, при што се очекува во наредниот период да биде претставено и уште едно ново засилување.
Пелистер новата сезона во Втората македонска фудбалска лига ќе ја отвори на 15 август, кога на домашен терен ќе го пречека дебитантот Камјани, во натпревар со кој битолчани ќе ја започнат мисијата за враќање меѓу најдобрите македонски клубови.
