Општина Конче за првпат ќе добие организирана ракометна школа, откако беше воспоставена официјална соработка помеѓу Општината и Ракометниот клуб Феникс од Радовиш. Со почетокот на новата учебна година, клубот ќе започне со работа во Конче, отворајќи ново спортско поглавје за младите од оваа рурална општина.
Со ова, Конче уште еднаш потврдува дека е вистинска општина на спортот. По борењето и фудбалот, младите за првпат ќе имаат можност организирано да тренираат и да играат ракомет, што претставува значаен чекор во проширувањето на спортските содржини за младите. Воедно, општината останува силно посветена и на организацијата и поддршката на бројни културни настани.
Заложбите на градоначалникот Златко Ристов, заедно со Советот на Општина Конче, уште еднаш покажуваат дека развојот на спортот и младите е еден од главните приоритети на локалната самоуправа, која продолжува да создава услови за нови спортски можности.
Претседателот на РК Феникс, Игор Соколов, истакна дека сите деца од Конче ќе имаат можност да се запишат во школата и да тренираат ракомет преку системска и стручна работа – од совладување на основните ракометни техники, па сè до создавање на идни ракометни ѕвезди кои ќе бидат гордост на Општина Конче.
Во знак на воспоставената соработка, градоначалникот Златко Ристов и претседателот на РК Феникс, Игор Соколов, си подадоа рака, а Соколов му врачи клупски дрес на градоначалникот Ристов како симбол на благодарност, почит и признание за силната поддршка што Општина Конче му ја дава на клубот и на развојот на ракометот во општината.
