Македонскиот футсал шампион Проект ги доби противниците за настапот во прелиминарната рунда од Лигата на шампионите за сезоната 2026/27, по денешната ждрепка што се одржа во седиштето на УЕФА во Нион.
Тимот од Јосифово ќе игра во исклучително силна група, каде за ривали ќе ги има шампионите на Словенија – Врхника, Австрија – Атлетик Грац и Израел – Макаби. Натпреварите од оваа фаза ќе се одиграат во периодот од 25 до 30 август.
Од клубот порачаа дека со голем респект гледаат кон секој противник, но без страв ќе влезат во сите натпревари, нагласувајќи дека е голема чест да се претставува Македонија на европската сцена.
Целта на Проект останува непроменета – максимален ангажман и борба за пласман во следната фаза.
„Не ја добивме најлесната група, ниту ја баравме. Баравме можност да покажеме кои сме“, порачаа од македонскиот шампион по ждрепката.
Проект во квалификациите влегува по историска сезона, во која за првпат ја обедини двојната круна во македонскиот футсал. Тимот ја освои втората шампионска титула и првиот Куп на Македонија, при што до двата трофеи стигна без ниту еден пораз и без ниту едно реми – доминација што го потврди како најдобар македонски футсал состав во изминатата сезона.
