Вардар не успеа со позитивен резултат да ја започне европската авантура во Лигата на шампионите.
Македонскиот шампион на Арената „Тодор Проески“ загуби со 0:2 од финскиот првак КуПс, кој со оваа предност ќе патува на реваншот.
Пред околу 4.000 гледачи, Вардар имаше неколку обиди преку Горан Закариќ и Бобан Николов, но не успеа да ја најде мрежата на противникот.
Клучниот момент се случи во финишот на првото полувреме, кога КуПс поведе по корнер. Брахима Магаса најдобро се снајде во шеснаесетникот и со удар со глава го совлада Давор Талески за 0:1.
Само што започна вториот дел, финскиот состав стигна и до втор погодок. Во 49. минута Боб Армах доби простор на левата страна и со силен удар по земја ја зголеми предноста на гостите.
Тренерот Кристијан Фабијани се обиде да внесе свежина со неколку измени, во игра влегоа Герсон Родригеш, Михаил Маневски, Немања Босанчиќ и Димитар Данев, но Вардар не успеа сериозно да го загрози голот на КуПс.
Најдобрата можност за намалување на резултатот ја имаше Бобан Николов во 73. минута, но неговиот удар заврши покрај дирекот. Во завршницата Вардар остана и со играч помалку по исклучувањето на Немања Босанчиќ поради два жолти картони.
Реваншот ќе се одигра за седум дена во Куопио, каде Вардар ќе има тешка задача да ја анулира негативата, а победникот од двомечот ќе се соочи со подобриот од дуелот меѓу Сабах и ТНС.
