Познати последните четвртфиналисти на турнирот во мал фудбал „Петровден 2026“ кој се игра во Мешеишта.
И вечерва три мечеви со многу погодоци, на два натпревари имаше убедливи победници, а еден меч се решаваше со удари од белата точка.
Тежок пораз доживеа тимот на Гранит Х откако со 0:3 загуби од Златара Бени Ерол и ги заврши настапите. Херој за победничката екипа беше Доко Насер кој беше двоен стрелец, а еден гол постигна Љатив Фератоски.
Пред крајот на првиот дел Доко го отвори резултатот за водство од 0:1, а во финишот на мечот Фаратоски погоди за двојна предност, а потоа уште еден гол постигна Доко за конечни 0:3.
Неверојатен меч имаше меѓу Сатеска и Гостилница кај Мече откако „мечињата“ загубија на пенали по регуларните 2:2.
Резултатот го отвори Никола Тупанчески во 19. минута за водство од 1:0 на полувреме. Стартот од вториот дел донесе израмнување преку Арбен Бајрами на 1:1. Во 37. минута, истиот играч погоди за 1:2 и водство на „мечињата“, но радоста траеше само две минути кога Димитар Скепароски погоди за конечни 2:2.
Во пенал серијата за Сатеска сигурни реализатори беа Никола Скепароски, Димитар Скепароски, Бојан Тупанчески и Даниел Митрески, за екипата на Гостилница кај Мече погодија Хадис Сулејмани и Дарко Гаврилоски.
Екипата на Чардак Велгошти патува во четвртфиналето откако со сигурна игра го доби Етно ресторан Дедо Димо со резултат од 3:1.
Давид Кармачоски и Лео Шопоски по пет минути игра обезбедија двојна предност за тимот од Велгошти. За „угостителите“ погоди Александар Јанкулоски во 20. минута и намали на 2:1.
Неизвесноста беше до 30. минута кога Давид Карамачоски со втор гол ги постави конечните 3:1.
Од утре стартува четвртфиналето, а на програмата ќе биде два натпревари. Првиот меч се игра во 21 часот, се среќаваат АСП Пак и Аце Најдески, еден час подоцна Златара Бени Ерол против Чардак Велгошти.
Спортска Мрежа годинава е медиумски покровител на овој спортски настан, кој има традиција од 51 година.
