Македонските кошаркарски репрезентации до 17 години забележаа два порази на вториот ден од меѓународниот турнир „Рисинг Старс“ кој се одржува во Букурешт, Романија.
Машката селекција не успеа да се спротивстави на силната репрезентација на Грција и беше поразена со убедливи 94:50. Грците уште од самиот почеток го наметнаа својот ритам и по првата четвртина имаа висока предност од 32:7, што се покажа како клучно за конечниот исход.
До полувремето противникот водеше со 54:25, а по три четвртини резултатот беше 73:41. Во последниот период Грција само ја потврди победата за конечни 94:50.
Најефикасен во македонскиот состав беше Стевков со 16 поени, додека Ѓиноски постигна седум, а Котевски шест поени.
Во последното коло од турнирот, македонските кадети во недела од 16:30 часот ќе се соочат со селекцијата на Романија Син .
По победата над Молдавија во првото коло, женската репрезентација до 17 години беше поразена од Романија Син со 58:27.
Нашите кошаркарки беа рамноправни во воведните минути, но домаќинот во втората четвртина создаде двоцифрена предност од 25:13. Романките продолжија со добрата игра и во третиот период, кога стигнаа до убедливи 43:22, предност која ја задржаа до самиот крај за конечни 58:27.
Во последниот натпревар на турнирот, македонските кошаркарки утре од 09:00 часот ќе играат против селекцијата Романија Жолт.
