Македонската сениорска кошаркарска репрезентација продолжува со подготовките за јулскиот ФИБА прозорец од претквалификациите за Европското првенство 2029. Првата проверка на формата и сработеното во досегашниот дел од подготовките избраниците на селекторот Жозеп Мариа Берокал ќе ја имаат против селекцијата на Бугарија.
По неколкудневните тренинзи во салата „Лазар Лечиќ“ во Скопје, македонските кошаркари во недела ќе отпатуваат во Самоков, каде ќе го одиграат првиот контролен натпревар во рамките на подготвителниот период.
За дуелот со Бугарија, стручниот штаб ќе смета на 13 кошаркари. Репрезентацијата ја предводи капитенот Војдан Стојановски, а во составот се и Стојан Ѓуроски, Марин Петков, Валмир Какруки, Виктор Ефремовски, Лука Стојановски, Амар Хот, Павел Иванов, Виктор Ташовски, Мухамед Тачи, Марко Луканоски, Петар Бошалески и Тома Стојаноски.
Контролниот натпревар меѓу Бугарија и Македонија ќе се одигра во недела со почеток од 18:00 часот според македонско време и ќе претставува важен тест за „црвено-жолтите“ пред официјалните обврски во јулскиот циклус.
Македонија ја очекуваат уште два натпревари во групата А од претквалификациите за Евробаскет 2029. На 2 јули во Скопје ќе ја пречека селекцијата на Ирска, додека три дена подоцна, на 5 јули, ќе гостува кај селекцијата на Луксембург.
