Младата македонска тренерка Ивана Пејовска, која е дел од Академијата „Газели Волеј“, беше македонски претставник на „Тренерската конвенција 2026“, организирана од Европската одбојкарска конфедерација (ЦЕВ) од 12 до 14 јуни во португалскиот град Вијана до Кастело.
Станува збор за седмото издание на Конвенцијата, која се реализира во рамки на проектот „Играј одбојка – расти со неа“. Главен акцент на овогодишната програма беше ставен на создавање позитивна, инклузивна и развојно ориентирана тренерска методологија во работата со деца и млади категории.
Пејовска беше дел од група од околу 60 тренери од повеќе европски земји кои во текот на тридневниот настан имаа можност да следат предавања, практични презентации и да разменуваат искуства. Темите беа насочени кон тренажниот процес кај младите, физичката подготовка соодветна на возраста, како и развојот на спортистите преку креативен и современ пристап во тренинзите.
Учество на вакви настани претставува значајна можност за професионален развој на тренерите и унапредување на работата со младите одбојкари во Македонија.
