Три македонски одбојкарски клубови поднесоа пријави за учество во европските клупски натпреварувања на ЦЕВ за сезоната 2026/27. Станува збор за машкиот шампион Штип УГД, како и женските екипи Работнички Скопје и Јанта Волеј Кисела Вода.
Штип УГД, како актуелен шампион на Македонија, го искористи правото за настап во ЦЕВ Лигата на шампионите. За штипскиот состав ова ќе биде историски прв настап во најелитното европско клупско натпреварување, откако минатата сезона дебитираше на европската сцена во ЦЕВ Челинџ купот.
Кај дамите, Работнички Скопје ќе ја продолжи европската традиција и петта сезона по ред ќе настапува во некое од натпреварувањата на ЦЕВ. По трите учества во Лигата на шампионите и минатогодишниот настап во Челинџ купот, скопскиот клуб повторно се пријави за третото по ранг европско натпреварување.
Амбиции за европски настап има и Јанта Волеј Кисела Вода, која аплицираше за специјална покана за учество во ЦЕВ Челинџ купот. По успешната дебитантска сезона во македонската елита, клубот се надева на можност да се претстави и на меѓународната сцена.
Конечната листа на учесници ЦЕВ ќе ја објави до крајот на месецот, додека ждрепката за сите три европски клупски натпреварувања ќе се одржи на 15 јули во седиштето на организацијата во Луксембург.
