ФК АП Брера Струмица стави крај на шпекулациите околу иднината на клубот и преку официјално соопштение потврди дека и во наредната сезона ќе продолжи да функционира со сите свои структури, вклучувајќи ги младинските категории и сениорскиот тим.
Струмичани во новата сезона ќе се натпреваруваат во Втората македонска фудбалска лига, откако испаднаа од елитното друштво по поразот од Скопје со 0:1 во бараж натпреварот одигран во Битола. Од клубот сметаат дека настапот во второлигашката конкуренција ќе претставува нов предизвик и одлична можност за развој на младите фудбалери.
Брера зад себе има успешна сезона во младинските категории, каде ја освои двојната круна, а со тоа обезбеди и настап во Младинската Лига на шампиони на УЕФА по вторпат во својата историја. Во клубот потенцираат дека тоа е потврда за квалитетната работа, посветеноста на управата и стручниот кадар во развојот на младите таленти.
Дополнително, клубот располага со повеќе од 300 деца кои секојдневно тренираат и се натпреваруваат во неговите категории, а токму младинската школа ќе биде еден од главните приоритети во периодот што следува.
„Заради се позачестените дезинформации, невистини и манипулации кои кружат во јавноста, ФК „АП Брера Струмица“ ја известува јавноста дека и во наредната сезона ќе продолжи да се натпреварува како со младинските категории така и со сениорски состав во Втората македонска фудбалска лига која ќе биде одлично искуство и нов предизвик за нашите млади фудбалери. ФК „АП Брера Струмица“ има квалитет, има потенцијал. Доказ се нашите момци кои покажаа дека имаат карактер и победнички менталитет освојувајќи ја двојната круна во младинските натпреварувања. Со овој успех, нашите момци а со тоа и нашиот клуб по втор пат во својата историја ќе настапува во Младинската УЕФА лига на ШАМПИОНИ – што е потврда за правилната работа, посветеноста на нашата управа и стручниот тренерски кадар за развој на младите таленти во клубот. Паралелно ја информираме јавноста дека нашиот клуб брои повеќе од 300 деца кои секојдневно тренираат, се натпреваруваат и ја живеат љубовта кон фудбалот. Тие се иднината не само на нашиот клуб туку воопшто и на македонскиот фудбал. Тие се нашата дополнителна мотивација за нови долгорочни успеси. Токму затоа, овој период ќе го искористиме за реконструкција и дополнителна организација на младинската школа. Ќе работиме на создавање на уште подобри услови за развој на нашите идни фудбалери – затоа што децата го заслужуваат најдоброто. Ќе бидеме посветени на сопствениот потенцијал но и широко ги отвораме вратите за фудбалските надежи. Продолжуваме посилни, поорганизирани и со јасна визија за иднината“, велат од клубот.
