По една успешна сезона во дресот на Младост, 24-годишниот чувар на мрежата Кристијан Костадиновски и клубот од Богданци тргнуваат по различни патишта.
Костадиновски беше важна алка во тимот кој успеа да обезбеди кам-бек во ракометната елита, а со своите одбрани и сигурност меѓу стативите даде значаен придонес во остварувањето на големата цел на богданчани.
Станува збор за квалитетен голман кој во изминатиот период покажа континуитет во формата и голем напредок во својата игра. Токму затоа не изненадува фактот што за неговите услуги постои сериозен интерес од странство.
Според информациите, Костадиновски има понуди од неколку клубови од Босна и Херцеговина, како и од Италија, а неговата следна дестинација најверојатно ќе биде надвор од Македонија. Интересот од странските клубови е резултат на неговите добри настапи, квалитетот што го поседува и успесите кои ги бележи во кариерата.
Голманот, кој е висок 190 сантиметри, зад себе има богато искуство на домашната сцена. Покрај настапите за Младост, тој ги бранеше боите и на Радовиш, како и на својот матичен клуб Пелистер.
Пред Костадиновски сега следува нов предизвик и можност за интернационална кариера, а останува да се види дали неговата следна станица ќе биде Босна и Херцеговина или Италија. Ако битолчанецот се одлучи да прифати понуда од Италија или Босна и Херцеговина, тоа ќе биде негов прв интернационален трансфер.
