Ибрахим Алији од редовите на дебитантот Балкан ја одбележа сезоната во Првата футсал лига на Македонија и убедливо заврши како најдобар стрелец во шампионатот со дури 44 постигнати погодоци.
Футсалерот на Балкан беше вистинска гол-машина во текот на целата сезона и зад себе остави голема конкуренција. Втор на листата на стрелци е Марио Благојевски од новиот шампион Проект со 33 погодоци, додека третото место му припадна на Берат Рамадани од Форца, кој постигна 24 гола.
Веднаш зад нив се најде Иса Дурмишов од Мал Ајакс од Штип со 23 погодоци, додека по 22 гола постигнаа Фуркан Шабани од Јувентус Серава и Еркна Сеферин од Шкупи.
Меѓу најдобрите стрелци сезонава се и Ѓорги Коцевски од шампионот Проект со 21 погодок, како и Кристијан Стојановски од Осогово Крива Паланка, кој сезоната ја заврши со 20 постигнати гола.
Инаку, екипата на Проект испиша историја во македонскиот футсал, откако со максимални 18 победи од исто толку натпревари ја освои шампионската титула во Првата футсал лига. Тимот сезонава ја освои и Куп титулата, со што стигна до двојната круна.
Од елитното друштво испаднаа Балкан и Мал Ајакс, но и покрај тоа Алији и Дурмишов оставија силен впечаток со своите голгетерски изданија.
