Пелистер доминира во статистиката: Битолчани лидери по поени и реализација во „МТЕЛ“ Супер лигата

По завршувањето на регуларниот дел од сезоната во МТЕЛ Супер лига, статистиката открива јасна слика за тимската доминација, а во центарот на вниманието е екипата на Пелистер, која предничи во неколку клучни категории.

Битолчани, предводени од тренерот Борче Даскаловски, се најдобрата поентерска екипа во лигата со просек од 91.5 поени по натпревар. Зад нив се наоѓаат изненадувањето на сезоната Маџари со 85.4, како и лидерот на табелата ТФТ со 85.0 поени во просек.

Пелистер се истакнува и со најдобра реализација за три поени (35.8%), оставајќи ги зад себе МЗТ Скопје Аеродром со 34.4% и Работнички со 33.6%. Дополнително, „зелено-белите“ се лидери и во реализацијата за два поени со 59.6%, минимално пред МКК Куманово (59.4%) и Кожув (56.9%).

Во категоријата слободни фрлања, врвот го презеде Работнички со 75.7% успешност, пред Кожув со 75.4%, додека Пелистер е трет со 74.3%.

Актуелниот шампион МЗТ Скопје Аеродром доминира под кошевите со просек од 40.2 скока по натпревар, повеќе од Чаир 2030 (39.4) и Маџари (39.3).

Во делот на организацијата на играта, најдобар е МКК Куманово со 21.7 асистенции во просек, пред Пелистер (19.3) и Кожув (19.2). Кумановци се лидери и во блокадите со 3.5 по натпревар, пред Работнички (3.1) и Феникс 2010 (3.0).

ТФТ е тимот со најмногу освоени топки – 8.7 по натпревар, веднаш пред Маџари (8.6) и Пелистер (8.4).

На крајот, Кожув се издвојува како најдисциплиниран тим според бројот на загубени топки, со само 11.6 во просек, подобро од МЗТ Скопје Аеродром (11.7) и Пелистер (12.4).

Сите овие бројки ја потврдуваат квалитетната и изедначена конкуренција во македонската кошаркарска елита, но и јасно ја издвојуваат екипата на Пелистер како еден од најконзистентните тимови во сезоната.