Џудо клубот Дрим од Струга имаше успешно претставување на престижен меѓународен турнир одржан на 2 мај 2026 година во Нови Биджов, Чешка, каде учество зедоа над 1100 натпреварувачи од повеќе земји.
Стружани настапија со седум џудисти, предводени од тренерот Андреј Чакаровски, и оставија силен впечаток во конкуренција исполнета со квалитет. Нивната борбеност и посветеност резултираа со три освоени бронзени медали, кои ги освоија Давид Спироски во категоријата до 55 килограми, Енил Ајдиноски до 66 килограми и Лука Трца до 73 килограми, сите во возрасната категорија до 14 години.
Покрај освојувачите на медали, со достојни настапи се истакнаа и Драгица Рафтоска, Даријан Ночески, Амар Бајрамоски и Мартина Салви, кои иако не се искачија на пиедесталот, покажаа голема храброст и спортски дух, борејќи се рамноправно со силната конкуренција.
Настапот во Чешка претставува уште една потврда за квалитетната работа во клубот и за потенцијалот на младите џудисти, кои успешно ги бранат боите на својот клуб и Македонија на меѓународната сцена.
