Охриѓани ја живеат една од своите најуспешни сезони во својата клупска историја, а пред тимот е нов голем предизвик – полуфиналниот двомеч со Целје во ЕХФ Купот. За Спортска Мрежа, членот на стручниот штаб, и поранешен ракометар на Охрид- Крсте Андоновски направи анализа на досегашните резултати и најави што може да се очекува од европскиот предизвик.
Андоновски најпрво се осврна на историската сезона на Охрид, истакнувајќи дека тимот бележи одлични резултати, иако финалето во Купот било загубено во неизвесна завршница поради скратен ростер и отсуство на клучни играчи.
„Оваа сезона е историска за нас, бидејќи бележиме извонредни резултати во домашното првенство, игравме Куп- финале кое несреќно го загубивме со еден гол разлика и тоа од големиот фаворит- Вардар. Велам несреќно, бидејќи имавме и предност, но поради скратениот ростер и отсуство на тројца главни играчи не успеавме да издржиме до крај. Но, сезоната е динамична и напорна..следно нè очекува полуфинален европски двомеч со екипата на Целје.“
Во продолжение, тој го анализираше противникот, потенцирајќи го квалитетот и потенцијалот на тимот на Целје, но и условите под кои Охрид може да се надева на позитивен исход.
„Целје е еден навистина силен противник, кој до неодамна се натпреваруваше во Лигата на шампионите, екипа составена од млади и талентирани играчи со голем потенцијал, кои во наредните години ќе играат во најсилните клубови во Европа. Поради отсуство на неколку значајни играчи во нашиот тим и знаејќи го потенцијалот на противничката екипа- им ја препуштаме фаворитската улога. Двата натпревари се подеднакво важни и доколку ја сопреме нивната брза игра и одиграме цврста одбрана, имаме и ние свои шанси.”- изјави Андоновски за Спортска Мрежа.
Охрид со респект, но и со верба во сопствените квалитети ќе влезе во дуелот со Целје, со јасна цел – да ја продолжи европската приказна и да направи уште еден чекор кон историскиот успех.
