РК Еурофарм Пелистер ја информираше јавноста дека тренерот Стевче Алушовски поднесе оставка по поразот во полуфиналето од Купот на Македонија во Струмица.
Раководството на клубот ја прифати неговата одлука и му се заблагодари за професионалниот ангажман во периодот додека беше на клупата на актуелниот шампион.
Пелистерци беа поразени од Охрид со убедливи 26:19, резултат што донесе крај на нивниот настап во Купот, но и промени на тренерската позиција. Триумфот на „гладијаторите“ во Струмица се покажа како пресуден момент за разделбата со Алушовски.
До крајот на сезоната, екипата ќе ја предводи досегашниот асистент Алексо Лембанов, кој ќе има задача да го одржи тимот во натпреварувачки ритам во завршницата од сезоната.
