Кошаркарите на Шар Планина возвратија на вистински начин и изборија решавачки трет натпревар во финалната серија за пласман во Првата македонска лига. Тимот од Гостивар на домашен терен славеше со убедливи 68-56 против Гевгелија и го израмни резултатот на 1-1.
Домаќините од самиот почеток наметнаа свој ритам и постепено ја градеа предноста. По израмнетата прва четвртина, Шар Планина замина на пауза со позитива (29-23), а во второто полувреме целосно ја презеде контролата и не дозволи изненадување.
Клучната разлика беше направена во третиот период, кога гостиварци се одлепија на двоцифрена предност (48-34), која се покажа како недостижна за противникот до самиот крај.
Најефикасен кај победникот беше Лаковски со 19 поени, додека значаен придонес дадоа и Исајлоски (13), Србиновски (12) и Балоски (10). Кај Гевгелија, Ристов постигна 13 поени, а Костадинов и Божинов додадоа по 10.
Патникот во Првата лига ќе биде познат по одигрувањето на „мајсторката“, која следува викендов во Гевгелија, каде ќе падне конечната одлука за победникот во оваа неизвесна серија.
