Фудбалската репрезентација на Босна и Херцеговина на 29 мај ќе одигра пријателски натпревар против селекцијата на Северна Македонија, а интересот за овој дуел е огромен и веќе најавува вистинска фудбалска атмосфера во Сараево.
Натпреварот, кој ќе започне во 18 часот, ќе се одигра на најголемиот стадион во земјата – „Кошево“, каде што се очекува присуство од околу 30.000 гледачи. Според најавите, продажбата на билетите треба да започне во наредните десетина дена преку онлајн платформа.
Овој контролен натпревар ќе биде дел од подготовките на босанската селекција за претстојното Светско првенство, кое годинава ќе се одржи во САД, Канада и Мексико. Очекувањата се дека овој дуел ќе послужи како важен тест пред настапот на најголемата светска сцена.
Босна и Херцеговина обезбеди пласман на Мундијалот преку баражот, каде што славеше против Велс и Италија, а со ждрепката е сместена во група Б заедно со Канада, Швајцарија и Катар.
Првиот натпревар на Светското првенство босанската селекција ќе го одигра на 12 јуни во Торонто против Канада, по што следуваат дуелите со Швајцарија и Катар.
Пријателскиот натпревар против Македонија ќе биде добра можност за двете селекции да ја проверат формата, но и да понудат вистински фудбалски спектакл пред полните трибини во Сараево.
