Младиот македонски тенисер Марко Алексовски продолжува со успешните настапи оваа календарска година. Изминатава недела Алексовски како втор носител играше во финалето на турнирот во Нови Сад од категорија 2 со што ја оправда и фаворитската улога.
Во првите три меча македонскиот тенисер постигна три победи од 2:0 во сетови. Во првото коло го победи Петар Травица од Србија препуштајќи само два гема (6:1 и 6:1), во следното коло го совлада Џејмс Бартон од Австралија со загубени четири гема (6:2 и 6:2, а нешто повеќе гемови одигра во третата рунда против Германецот Јон Бунткер (7:5 и 6:2).
Во четвртфиналето со пресврт стигна до победата над Романецот Стефан Сабо – 2:1 (3.6; 6:3 и 10:5 на поени), а во полуфиналето по голема борба исто така со пресврт го совлада Лука Костиќ од Србија со 2:1 (3.6; 6:1 и 6:2).
Серијата тешки мечеви остави трага и во финалето Алексовски беше поразен од првиот носител Павле Стојиљковиќ од Србија со 2:0 во сетови (6:2 и 6:2).
На турнирот настапија уште двајца македонски тенисери Дарјан Пановски и Алексеј Стојановски, кои беа елиминирани во второто коло, додека кај девојчињата настапи Стефанија Вељковиќ.
