Женската тениска репрезентација на Македонија од денес ги започнува настапите во Втората Евро-африканска зона од Били Џин Кинг Купот, кој се одржува во Бања Лука.
Македонија е дел од групата Б, каде за противници ги има селекциите на Бугарија, Мароко, Египет и Јужна Африка.
За нашата репрезентација ќе настапат Сара Митевска, Ана Митевска, Јана Божиновска и Зара Зафировска, додека на селекторската позиција своето деби ќе го има Кристијан Вангелов.
Во првото коло, македонските тенисерки ќе се соочат со Египет – селекција која заедно со Бугарија важи за главен фаворит во групата. Египет во својот состав ги има Сандра Самир (367. место на ВТА листата) и Ламис Алхусеин Абдел Азиз (404. место на ВТА), што дополнително ја потврдува нивната сила.
Во второто коло, кое се игра во вторник, Македонија ќе биде слободна.
Во групата А ќе се натпреваруваат Австрија, Грција, Босна и Херцеговина, Кипар и Финска.
На првиот натпреварувачки ден, покрај дуелот Македонија – Египет, во групата Б ќе играат и Бугарија против Јужна Африка, додека слободна ќе биде селекцијата на Мароко.
Во групата А, двојките во првото коло се Австрија – Финска и Грција – Кипар, а домаќинот Босна и Херцеговина ќе го прескокне првото коло.
