Женската тениска репрезентација на Македонија отпатува за Бања Лука, каде од 6 до 11 април ќе настапува во рамки на Втората Евро-африканска зона од Били Џин Кинг купот. Оваа година во конкуренција се десет селекции, а системот на натпреварување е изменет.
Годинашното издание обединува седум европски и три африкански репрезентации. Македонија ќе настапи со подмладен состав во кој се Сара Митевска, Ана Митевска, Јана Божиновска и Зара Зафировска. Натпреварите ќе се играат на отворено, на земјена подлога.
„Имавме добри подготовки, девојките тренираа напорно и атмосферата во тимот е одлична. Сме најмлада репрезентација, па во повеќето мечеви противничките ќе ја имаат фаворитската улога, но ние ќе се бориме и ќе се обидеме да приредиме изненадувања“, изјави селекторот Кристијан Вангелов, за кого ова ќе биде деби на клупата.
Во однос на отсуството на искусните Лина Ѓорческа и Магдалена Стоилковска, Вангелов појасни дека Ѓорческа била пријавена, но поради повреда морала да го промени својот календар и да го откаже настапот. Стоилковска, пак, моментално не настапува, а како што најави селекторот, причината е позитивна и таа самата ќе ја сподели во наредниот период.
Десетте репрезентации ќе бидат поделени во две групи од по пет тима, каде ќе се игра по систем „секој со секого“. Двете најдобри селекции од секоја група ќе се вкрстат во полуфинале (А1-Б2 и Б1-А2), а победниците ќе обезбедат пласман во Првата Евро-африканска зона.
Селекциите кои ќе завршат на третото и четвртото место ќе играат мечеви за опстанок, додека последнопласираните од групите ќе се соочат меѓусебно за конечен пласман. Натпреварите од групната фаза ќе се играат од понеделник до петок, а завршните мечеви се закажани за сабота.
Ждрепката за групите ќе се одржи во недела. Од Европа учеснички се Австрија, Бугарија, Кипар, Финска, Грција, Македонија, Норвешка и домаќинот Босна и Херцеговина, додека од Африка ќе настапат Египет, Мароко и Јужна Африка.
