По неочекуваниот пораз од Работнички, фудбалерите на Башкими се целосно насочени кон следниот предизвик, со јасна цел – освојување на нови три бода и задржување на стабилната позиција во средината на табелата во Првата лига.
Оптимизмот во редовите на кумановскиот тим се темели и на последниот меѓусебен дуел, во кој Башкими славеше убедлива победа од 2-0, со погодоци на Ор и Рибеиро. Напаѓачот Филип Алексовски е уверен дека тимот има квалитет да стигне до нов триумф и потенцира дека сите играчи ќе дадат максимум за да ја исполнат зацртаната цел.
„Повторно играме против Шкупи за многу краток период, овој пат пред нашата публика. По поразот од Работнички, кој малку нè изненади, сакаме да ги израдуваме нашите навивачи со победа. Овие три бода се клучни за да ја ‘бетонираме’ нашата позиција во средината на табелата. Подготвени сме и мотивирани да го дадеме максимумот“, изјави Алексовски.
Статистички гледано, Башкими досега има подобар учинок во меѓусебните пресметки со пет остварени победи, наспроти трите триумфи на Шкупи, додека само еден натпревар завршил без победник.
