Финалниот турнир од Купот на ОФМ 2026 во машка и женска конкуренција, по пауза од 15 години, повторно ќе се одржи во главниот град. Извршниот одбор на Одбојкарската федерација на Македонија одлучи завршниот турнир да се игра од 26 до 28 март 2026 година во спортскиот центар „Јане Сандански“ во Скопје.
Федерацијата ја продолжува традицијата најдобрите четири екипи во куп-натпреварувањето, и во машка и во женска конкуренција, преку тридневна програма да се борат за првите трофеи во сезоната.
Во машка конкуренција на завршниот турнир ќе настапат истите екипи како и минатата сезона – бранителот на трофејот Штип УГД, ланскиот финалист Струмица 47&72, како и ГОК Борец и Работнички 71&22.
Кај дамите, пак, Наковски Волеј ќе ја брани титулата против предизвикувачите Младост УГД, Вардар ЕМ и Газели Волеј. За овие три екипи ова ќе биде историски настап, бидејќи за првпат ќе учествуваат на Ф4 турнир во Купот.
Во договор со медиумскиот партнер, Македонската радиотелевизија, која ќе врши директен пренос на сите натпревари, утврден е и распоредот на одигрување. На 26 март ќе се играат полуфиналните натпревари во женска конкуренција со почеток од 17:30 и 19:30 часот. Ден подоцна, во истите термини, ќе се одиграат полуфиналните средби кај мажите.
Големото финале е закажано за 28 март, кога најпрво ќе се игра финалето во женска конкуренција од 17:30 часот, а потоа и машкото финале од 19:30 часот.
Ждрепката за полуфиналните парови во двете конкуренции е предвидено да се одржи следната седмица во присуство на претставници од екипите учеснички. Датумот, времето и местото на ждрепката дополнително ќе ги потврди Комесарот за натпреварување.
