Македонскиот репрезентативен голман, Мартин Томовски, продолжува да блеска во втората германската Бундеслига и повторно беше меѓу клучните играчи во новата победа на својот тим Битигхајм.
Лидерот на табелата славеше на гостувањето кај Лудвигсхафен со убедливи 24-31, а македонскиот чувар на мрежата одигра уште една импресивна партија.
Томовски натпреварот го заврши со дури 15 успешни интервенции, при што неколку од нив дојдоа во моменти кога домашниот состав се обидуваше резултатски да се врати во игра. Со своите одбрани, македонскиот голман повторно ја оттурна опасноста и му даде дополнителна сигурност на својот тим.
Битигхајм уште од почетокот го наметна темпото и постепено ја градеше предноста, а одбраните на Томовски беа клучни за гостите да ја задржат контролата врз натпреварот.
Со новите бодови германскиот тим ја продолжи победничката серија и дополнително ја зацврсти лидерската позиција во шампионатот, а македонскиот репрезентативец уште еднаш потврди дека се наоѓа во одлична форма оваа сезона.
