Ракометарите на Еурофарм Пелистер се пласираа на завршниот турнир во Купот на Македонија, откако во финалето од четвртфиналната група славеа против Прилеп со 30-28 во салата „Боро Чурлевски“ во Битола.
Прилепчани повторно покажаа дека се незгоден противник и долго време му парираа на актуелниот шампион. Во првото полувреме се играше израмнет ракомет, па на паузата резултатот беше 14-14.
Клучниот момент на натпреварот се случи на почетокот од вториот дел кога битолскиот тим направи серија од неколку погодоци и успеа да се одлепи резултатски. Иако Прилеп се обидуваше да се врати во игра, Еурофарм Пелистер ја задржа предноста и на крајот ја обезбеди победата.
Во редовите на битолчани најрасположени беа Андреј Видомски и Петар Атанасијевиќ, додека кај гостите од Прилеп најпрецизен беше Денис Шабановиќ.
Со оваа победа Еурофарм Пелистер стана првиот тим што обезбеди место на завршниот турнир во Купот на Македонија, каде ќе се бори за освојување на трофејот.
