Македонскиот интернационалец Бехар Фета продолжува со одличните настапи во Словенија, откако денеска со својот погодок му донесе победа на Алуминиј од 2:1 против лидерот Целје на домашен терен.
Фета игра во одлична форма во словенечкиот шампионат, а овој гол со кој обезбеди три бода за својот тим е уште една потврда за квалитетот на 22-годишниот фудбалер, поранешен младински репрезентативец на Македонија.
Ова е деветта победа за тимот на Алуминиј во сезоната, кој сега се наоѓа на седмото место на табелата со 31 бод. Во следното коло Алуминиј ќе го пречека Копер на домашен терен, во уште еден дерби натпревар против третопласираниот тим на табелата.
Целје, пак, го забележа вториот пораз во низа, но и натаму останува лидер со 50 бодови.
Инаку, како што претходно објави Спортска Мрежа, според информации до кои дојдовме, одличната форма на Фета го привлекува интересот на Џенова и Динамо Загреб, па можно е младиот фудбалер на лето да ја промени средината.
Фета кариерата ја започна во Фортуна, а потоа настапуваше за Њу Старс и Шкендија од Тетово. Потоа се пресели во охридска Воска Спорт, од каде го реализираше својот прв интернационален трансфер, по успехот со тимот да обезбеди пласман од Втора во Прва македонска фудбалска лига, каде беше и убедливо најдобар стрелец.
