Екипата на РК Бутел Скопје е повторно дел од суперлигашкиот плеј-оф. Откако во сезоната 2018/19 влезе во елитната конкуренција, тимот континуирано е меѓу најдобрите, а и оваа сезона ја потврди стабилноста и концептот кој се темели на работа со домашни ракометари.
Со победата во директниот дуел против РК Тиквеш, бутелци сами си ја заверија визата за разигрувањето за титулата. Тренерот- Горан Кузманоски, за Спортска Мрежа, направи осврт на клучниот натпревар, регуларниот дел од сезоната и амбициите во плеј-офот.
Дербито што решаваше сè
Кузманоски истакнува дека уште по зимската пауза било јасно дека мечот со Тиквеш може да биде пресуден и дека подготовката била максимално сериозна:
„ Со Тиквеш некако ни се сложија коцките да решаваме во последното коло. Знаеме дека Тиквеш во последните години е секогаш со пласман во плеј-оф и игра во европските купови. Знаевме дека нема да биде лесно, бевме фокусирани со 200% на овој меч, кој го чекавме и знаевме дека ќе ни биде важен уште после паузата за Нова година. Влеговме максимално концентрирани сите до еден, иако Тиквеш веќе претходно имаше обезбедено плеј-оф. Знаеме дека се работи за доста сериозна екипа, искусна, која во важни натпревари знае што игра.“
Тешка сезона и остварена цел
Тренерот потенцира дека борбата за место во плеј-офот била исклучително неизвесна, особено во конкуренција каде разликите се мали, а квалитетот висок:
„Генерално, оваа сезона беше тешко за пласман во плеј-оф , затоа што ако ја изземам онаа прва четворка што се бори за шампионската титула, од почетокот на табелата, следува уште една квалитетна четворка, од која првите две места водат во плеј-оф, иако, ние, како генерално најмлада екипа во лигата, составена само од Македонци, амбициите од почетокот ни беа плеј-оф, не дека клубот го бараше тоа од нас со 100% да бидеме во плеј-оф, туку пред сè целта и амбициите ни беа да се развиваат македонските играчи – дел од кадетите и младинските репрезентативци да се приклучат во првиот тим, но пруживме неколку добри натпревари, со конкурентите за плеј-оф одигравме добро и според планот, па така заслужено и се пласиравме во плеј-оф.“
Плеј-оф без притисок, но со максимален пристап
Во пресрет на разигрувањето, Кузманоски нагласува дека неговиот тим нема што да загуби, туку може само да добие – пред сè искуство:
,,Секако, сега приказната ќе ни биде полесна, сепак ние ќе продолжиме да играме, да даваме максимум од себе против секого, секој натпревар ќе ни биде доста тежок, па нема што да загубиме, можеме само многу да добиеме- младите играчи да се стекнат со сè повеќе искуство затоа што во последните неколку години, а сметам дека особено оваа година лигата е најсилна, ќе биде доста изедначена и во борбата за титула, како што беше и во битката за плеј-оф.“
Континуитет и нова генерација лидери
Стратегот на Бутел се осврна и на карактерот на екипата и улогата на поискусните ракометари во развојот на младите:
„Исто така, морам да потенцирам и дека во досегашниот терк на клубот, од почетокот на оваа сезона па до денес, не се опуштивме со ниеден меч иако некогаш со некоја екипа знаевме да одиграме можеби послабо, со некоја подобро, но сепак се вративме. Морам да напоменам дека од капитенот Ѓеоргиевски, до двајцата голмани кои се најискусни – Трајковски и Стојановски, младите некако го прифатија тоа и станаа лидери, значи таа генерација на 2004 младинските репрезентативци, 2006 и 2008, која полека се приклучи на првиот тим, веќе оформуваат една база во Бутел којашто мислам дека во иднина ќе биде добар столб за македонски играчи и за македонскиот ракомет воопшто.”- вели Кузманоски за Спортска Мрежа.
Осмото последователно учество во плеј-офот за Бутел не е случајност, туку резултат на јасна стратегија и доверба во домашниот потенцијал. Со најмлад состав меѓу најдобрите и без странски засилувања, скопскиот тим влегува во разигрувањето без притисок, но со амбиција за напредок.
За Кузманоски и неговите избраници, плеј-офот не е само натпреварување за бодови – туку процес на создавање нова генерација што треба да биде иднината на клубот и на македонскиот ракомет.
