Проект останува непоразен во Првата футсал лига откако вечерва и по вторпат сезонава го совлада шампионот Форца, овој пат на гостински терен во Куманово со резултат 6:7, за големо славје на стартот од пролетниот дел.
Десеттото коло донесе неверојатни 13 погодоци, многу пресврти, неизвесност, шанси и атрактивни моменти. Овој триумф претставува голем чекор кон тоа Проект да стане шампион и по неколку години да ја врати титулата во Јосифово.
Шампионот прв го отвори резултатот преку Берат Рамадани по само три минути игра, а Марио Благојевски во 7. минута израмни на 1:1. Сепак, по само шеесетина секунди, Проект преку вториот гол на Рамадани повторно поведе со 2:1.
Голеадата продолжи кога искусниот Мартин Тодоровски во 10. минута погоди за 2:2, а само една минута подоцна Бојан Јанев стрелаше за 2:3, резултат со кој се замина на полувреме.
Вториот дел донесе уште повеќе возбудувања и неизвесност. Форца направи пресврт и поведе со 4:3 благодарение на головите на Руфат Чалафи и Иљаз Чилаљи. Потоа следуваа два гола на Проект за ново водство од 4:5 – стрелци беа Тодоровски, кој го постигна својот втор погодок, и новото засилување Давид Ристовски.
Натпреварот доби инфарктна завршница кога Форца повторно собра сили и со два брзи гола на Чалафи, кој комплетираше хет-трик, поведе со 6:5 на пет минути до крајот.
Во 37. минута Димитар Јанев израмни на 6:6, а во самиот финиш Благојевски со својот втор гол ги постави конечните 6:7 за неверојатно славје на Проект.
Шампањското во Јосифово веќе може да се лади – Проект се искачи на плус девет бодови во однос на шампионот Форца и незапирливо чекори кон титулата.
Оваа огромна победа јасно ги исцртува контурите за новиот шампион во Македонија, а Проект сериозно атакува и на двојна круна.
