Ракометарите на ГРК Охрид ги очекува нов голем европски предизвик, откако обезбедија пласман во осминафиналето од ЕХФ Европскиот Куп, каде за противник го добија силниот чешки претставник Дукла Прага.
Охриѓани до оваа фаза стигнаа по успешните настапи и елиминации на Баки од Азербејџан и Слога Добој од Босна и Херцеговина, со што уште еднаш покажаа дека се подготвени за сериозни европски дуели.
Првиот осминафинален натпревар е закажан за 14 февруари (сабота) во СРЦ „Билјанини Извори“, со почеток од 18:00 часот, а билетите за овој европски спектакл веќе се пуштени во продажба.
Во пресрет на двомечот со Дукла Прага, тренерот на ГРК Охрид, Борис Ројевиќ, во ексклузивна изјава за Спортска Мрежа, го најави европскиот дуел, потенцирајќи го квалитетот и искуството на чешкиот тим.
„Дукла Прага е квалитетен тим со голема традиција. Се надеваме на пласман понатаму, иако противникот е многу сериозен. Тие имаат три членови на чешката репрезентација и тренер кој води и национален тим, а нивниот најдобар играч, Јонас, постигна 25 голови на три натпревари, на неодамна завршеното Европско првенство.“
Изјавата на Ројевиќ уште еднаш ја нагласува тежината на претстојниот предизвик, но и амбициите на охридскиот тим да направи нов чекор напред на европската сцена, со поддршка од домашната публика во „Билјанини Извори“.
Целото интервју на Спортска Мрежа со Ројевиќ можете да го прочитате овде.
