По одигрувањето на 11. коло во „Шпаркасе Лајф“ Првата женска кошаркарска лига се забележуваат одредени, но не и драстични промени на листите за индивидуални остварувања. Сепак, една кошаркарка и понатаму се издвојува како константа во статистиката – Кајла Томас од Пробаскет.
Американката е лидер на листата на стрелци со просек од 20.3 поени по натпревар и единствена кошаркарка во лигата која во просек реализира над 20 поени. Покрај тоа, Томас е и најдобар скокач во досегашниот тек од сезоната со вкупно 131 скок, односно 13.1 по натпревар, а води и во вкупниот процент на реализација од поле со извонредни 76.9%.
Во асистентскиот сегмент, Сања Адамовска од Баскет кам го „прескокна“ овој круг, но и понатаму е на врвот со просек од 7.3 асистенции, пред Милица Јовановиќ од Пробаскет со 6.4 додавања по натпревар.
Ана Лукиќ од Спорт тим е една од најекспонираните кошаркарки во лигата. Таа има најмногу загубени топки (7.4 во просек), но истовремено и најголема минутажа – речиси 39 минути по натпревар (38:46), што говори за нејзината важност во тимската игра.
Во дефанзивните категории, Катерина Поп-Димитровска (Баскет кам), како и Марија Николов и Јована Петрушевска од Бадел 1862, се најдобри во освојени топки со просек од 3.4, додека Аби Ниехуес од Крива Паланка е убедливо најдобар блокер со 3.5 блокади по натпревар.
Кога станува збор за прецизноста, Цветанка Димова од Баскет кам е најсигурна од линијата за слободни фрлања со 77.1% успешност, веднаш зад Ина Рашова (Патриот 2016), а пред Теа Трајковска и Марија Николов.
Теа Трајковска од Вардар е најпрецизна во шутот за два поени со 67.5% реализација, пред Кајла Томас (65.3%), додека Ива Чолакоска од Бадел 1862 се истакнува како најдобар шутер за три поени со 39.2%, пред Сања Адамовска.
По одигрувањето на 11. коло, индивидуалната статистика јасно покажува дека конкуренцијата во Првата лига е силна, а борбата за врвот – како тимски, така и индивидуално – станува сè поинтересна со секое наредно коло.
