Македонската олимписка делегација пристигна во Милано и официјално ги започна подготовките за настап на Олимписките игри во Милано и Кортина, каде што македонскиот спорт повторно ќе биде претставен на највисоко меѓународно ниво.
Делегацијата ја сочинуваат четворица натпреварувачи и шест официјални лица – тренери и медицински персонал, а истата е предводена од Цветанка Макаровски во улога на шеф на делегацијата. Македонските претставници се подготвени за нови спортски предизвици и докажувања на олимписката сцена.
Свеченото отворање на Олимписките игри ќе се одржи денес, на легендарниот стадион „Сан Сиро“ во Милано, со почеток во 20:00 часот по локално време. Покрај централната церемонија во Милано, истовремено ќе се одржат и паради на спортистите на олимписките објекти во Предацо, Ливињо и Кортина д’Ампецо, што ќе ѝ даде посебна димензија на манифестацијата низ северна Италија.
Македонското знаме на овие Олимписки игри ќе го носат Јана Атанасовска во Кортина и Ставре Јада во Предацо, кои ќе ја имаат честа да ја претставуваат државата на свечените церемонии.
Церемонијата на отворањето ќе биде пренесувана во живо на Македонската Радио Телевизија, додека информациите за точните термини на настапите на македонските натпреварувачи, како и сите актуелности директно од олимписките терени, ќе бидат достапни на официјалниот веб-сајт и на социјалните мрежи на Македонскиот олимписки комитет.
