Прволигашот ЖФК Каменица Саса на 20 јануари ќе ги започне подготовките за пролетниот дел од сезоната. Зимските подготовки ќе се реализираат во Македонска Каменица каде ги има сите потребни услови, два терени, теретана и сала.
ЖФК Каменица Саса ја прифати понудата за Антонина Шопска од страна на бугарскиот есенски шампион Лудогорец, како што истакна Златковски имаат прекрасни контакти со бугарскиот тим, воедно тој во минатото и настапуваше таму, а како што ни открива ексклузивно за Спортска Мрежа, клубот од Македонска Каменица ќе се засили со една фудбалерка од странство, а ќе има и едно домашно засилување, а неколку фудбалерки од младинските категории ќе се приклучат на првиот тим.
„Започнуваме со припреми на 20 јануари, вторник. Припремите се планирани да се одвиваат во Македонска Каменица, овде ги имаме сите потребни услови (два терени, теретана, сала) за да ја подготвиме екипата за подобри резултати во пролетниот дел. Што се однесува до трансфери, стигна понуда за Антонина Шопска од Бугарскиот есенски шампион Лудогорец (каде што јас имам прекрасни контакти, таму играв како играч) па проценивме дека понудата за неа е одлична и ние како клуб сакаме нашите фудбалерки да напредуваат па затоа ја прифативме понудата и таа веќе е фудбалерка на ЖФК Лудогорец. Ќе имаме и нови фудбалерки, една интернационалка која деновиве ќе потпише договор, а исто така и една фудбалерка од нашата Прва лига плус во сениорската екипа добиваат право на настап и две наши фудбалерки од младинките кои ќе придонесат квалитет сигурно“, вели Златковски.
Ќе има и неколку пријателски натпревари низ кој ќе се проверува формата.
„Пријателски натпревари ќе имаме секако, три или четири во зависност од временските услови“, дополнува Златковски.
Каменица Саса презимува на шестото место со 24 бодови, а пролетниот дел го отвара против Тиверија Брера на домашен терен.
