ГРК Охрид обезбеди пласман во финалето на меморијалниот турнир „Вук Рогановиќ“, кој се одржува во Белград, откако во полуфиналето убедливо го совлада Динамо Панчево.
Македонскиот претставник одигра зрел и контролиран натпревар, а предноста ја најави уште во првиот дел, кој го заврши со водство од 14-11. Во продолжението, српскиот тим во неколку наврати успеа да се доближи на два гола негатива, но Охрид не дозволи резултатски пресврт.
Клучен фактор во завршницата беше голманот Пилиповиќ, кој со неколку интервенции во серија ја скрши надежта на противникот. Пет минути пред крајот охриѓани стигнаа до плус шест, со што целосно ја затворија средбата и ја потврдија победата од 27-20.
Во второто полуфинале ќе се сретнат Партизан и Тримо Требње, а победникот од тој дуел ќе му биде противник на Охрид во утрешното финале, закажано за 17:00 часот.
