По поразот од домаќинот Данска, на стартот на Европското првенство, македонската ракометна репрезентација веќе го насочува фокусот кон следниот предизвик – дуелот со Португалија.
На денешната средба со новинарите, селекторот Кире Лазаров истакна дека Португалија пристигнала на шампионатот со високи амбиции, но нагласи дека сепак не припаѓа во истата класа со актуелниот европски и светски гигант Данска.
„Португалија е одлична селекција и овде дојде да се бори за медал, но не е на нивото на Данска. Мораме да бидеме позитивни и реални и да се обидеме да одиграме подобро од вчера. Сите посакуваме изненадување, но мора да стоиме цврсто на земја и да бидеме компетитивни“, изјави Лазаров.
Македонскиот селектор потенцира дека португалската репрезентација е детално анализирана и дека нивните амбиции значително пораснале во изминатиот период.
„Цела ноќ се занимавам со Португалија, како и изминатите шест месеци. Нивните апетити пораснаа, мислат дека можат и до медал. Ќе се обидеме да им го пореметиме планот“, додаде Лазаров.
Лазаров се осврна и на поразот од Данска, нагласувајќи дека ваквите натпревари се дел од процесот на учење и созревање.
„Ноќите за тренерите на големите натпреварувања се непреспиени. Мораме да сработиме и тоа што било и тоа што ќе биде. Данска се подготвува да биде европски првак и можеш да ги изненадиш само 5-10 минути. Ова е големо искуство за сите нас и треба побрзо да го заборавиме овој натпревар“, заврши селекторот.
Македонија натпреварот против Португалија ќе го одигра утре од 18:00 часот во Хернинг, во рамки на второто коло од групната фаза на Европското првенство.
