Европското првенство во ракомет само што започна, а македонското присуство на континенталниот собир е забележливо и надвор од теренот. Веќе во првото коло од групната фаза, македонските судии го добија дербито на колото.
Интернационалните ЕХФ арбитри од Битола, Димитар Митревски и Благојче Тодоровски, се делегирани да ја делат правдата во групната фаза во Малме, а ним им припадна еден од најатрактивните дуели на стартот на шампионатот.
Вечерва од 20:30 часот, во „Малме Арена“, Митревски и Тодоровски ќе го имаат својот деби-настап на Европско првенство, водејќи го натпреварот Шведска – Холандија.
Станува збор за исклучително важен натпревар во групата во која настапува и светскиот вицешампион Хрватска, која во првото коло се соочува со селекцијата на Грузија, што дополнително ја зголемува тежината на вечерашниот дуел.
За македонскиот судиски тандем, ова е прво Европско првенство во сениорска конкуренција, како круна на одличните настапи оваа сезона, во која судеа и неколку дерби-натпревари во Лигата на шампионите.
Македонија требаше да има уште еден судиски пар на шампионатот, искусните Ѓорѓи Начевски и Славе Николов, кои неочекувано беа повлечени од списокот на делегирани судии непосредно пред почетокот на Европското првенство.
