Фудбалската федерација на Македонија најавува важен чекор кон поголема транспарентност и доверба во судиските одлуки. Од пролетниот дел на сезоната, клубовите ќе добијат можност за директен увид во снимките и анализите од ВАР-собата, со цел подобро разбирање на спорните ситуации.
Новината ја соопшти претседателот на ФФМ, Масар Омерагиќ, кој истакна дека секој клуб кој ќе смета дека бил оштетен ќе може официјално да поднесе жалба. По поднесеното барање, ќе следи заедничка анализа на спорната ситуација, вклучувајќи и слушање на комуникацијата помеѓу судиите во ВАР-собата.
„Клубовите кои сметаат дека биле оштетени од ВАР, ќе можат да поднесат жалба до ФФМ. Потоа заедно ќе ја прегледаме снимката и ќе ги слушнеме разговорите од собата. Овој предлог ќе се достави до Управниот одбор на ФФМ, а од пролетниот дел ќе се донесе конечна одлука за тоа како видеата од ВАР-собата ќе станат достапни за сите клубови“, изјави Омерагиќ.
Предлогот веќе ќе биде доставен до Управниот одбор на ФФМ, по што се очекува официјална одлука за начинот на имплементација. Целта е јасна – намалување на сомнежите околу судиските одлуки и создавање пофер натпреварувачка средина во македонскиот фудбал.
ВАР-системот беше воведен од оваа сезона, веднаш по доаѓањето на Омерагиќ на чело на ФФМ, а најавените промени претставуваат дополнителен чекор кон негово унапредување и правилна примена во Првата лига.
