Екипата на Работнички влегува во период на сериозни промени, откако клубот се раздели со повеќе фудбалери од актуелниот ростер. „Романтичарите“ очигледно ќе мора да прават темелен ремонт во обид да ја стабилизираат формата и резултатите во продолжението од сезоната.
Од Дебар Маало си замина искусниот дефанзивец Виктор Велкоски, кој во пролетниот дел од ПМФЛ настапи на 14 натпревари. Велкоски, кој во клубот пристигна како слободен играч, зад себе има богата кариера со настапи во Македонија, но и во странство.
Клубот ја прекина соработката и со бразилскиот напаѓач Калани Алмеида. Тој одигра 15 првенствени натпревари, но не успеа да се запише во листата на стрелци. Алмеида пристигна минатото лето од Словенија, но не ги оправда очекувањата во офанзивата.
Дополнително, Работнички се раздели и со Демир Имери и Џелил Асани. Имери беше еден од поистакнатите поединци со три погодоци на 13 настапи, додека Асани одигра 14 меча во дресот на скопскиот тим.
Сите овие заминувања најавуваат бурен преоден рок за Работнички, кој се наоѓа во незавидна позиција на табелата и ќе мора да бара нови решенија за подобар настап во продолжението од сезоната.
Претходно, тимот се раздели и со српскиот стратег Ален Тупајиќ, па така Работнички сега е во потреба и по нов тренер.
