Делчево направи голем чекор напред во развојот на спортската инфраструктура, откако беше најавено дека во 2026 година ќе биде комплетно нова и современа спортска сала. Проектот има огромно значење за спортот, младите и спортските клубови во општината и претставува една од најважните инвестиции во последните години.
Новата сала ќе ги замени постојните објекти кои со децении не ги исполнуваат основните услови за тренинг и натпреварување, а реализацијата е овозможена со поддршка од Владата и Министерството за спорт.
Целта е Делчево да добие функционален, безбеден и модерен спортски центар, достоен за сите генерации спортисти.
Градоначалникот на Општина Делчево, Иван Гоцевски, за време на увидот во постоечката сала, ја истакна важноста на овој проект и чекорите кои следуваат:
„Денес, заедно со вредните и стручни екипи од Министерството за спорт и Општина Делчево, извршивме увид во постоечката сала која цели 24 години се наоѓа во навистина лоша, недостојна состојба. На лице место разговаравме за сите детали, потребни информации и чекори кои следуваат со цел целосна реконструкција и создавање на функционален, безбеден и модерен спортски објект. Ова не е само инвестиција во објект, туку инвестиција во иднината на нашите деца, спортисти и спортски клубови. Делчево заслужува услови за спорт какви што имаат и другите градови, и чекор по чекор тоа го остваруваме. Продолжуваме посветено да работиме за подобар, помодерен и поразвиен град. Оваа Влада докажува дека е вистински пријател на спортот и младите“, вели градоначалникот на Делчево, Иван Гоцевски.
Со изградбата на новата спортска сала, Делчево ќе добие услови за развој на повеќе спортови, ќе се зголеми интересот кај младите за активно спортување, а градот ќе стане поконкурентен и на регионално ниво. Овој проект се очекува да остави долгорочен позитивен белег врз спортот и целокупниот живот во општината.
