По поразот од Вардар, ракометарите на Охрид се решени да се вратат во ритам и повторно да заиграат победнички пред својата публика. Новата шанса ја добиваат веќе утре, повторно на домашен терен, каде ги очекува дуел со тимот на Еурофарм Пелистер 2.
Во таборот на охриѓани се свесни дека следниот период ќе биде исклучително тежок и напорен.
Асистент-тренерот на Охрид, Крсте Андоновски, нагласува дека тимот мора да остане целосно концентриран бидејќи го очекуваат три натпревари во само неколку дена – најпрво Пелистер 2 во Охрид, потоа гостување кај Тиквеш во Кавадарци, па нов домашен предизвик против актуелниот шампион- Еурофарм Пелистер.
„Зад нас е натпреварот со двократниот европски шампион Вардар кој е прв фаворит за освојување на домашното првенство оваа сезона. За жал, не успеавме да извојуваме победа на тој натпревар, но мислам дека го дадовме максимумот со оглед на тоа што минатата недела тренинзите се одвиваа без присуство на неколку клучни играчи. Ни следува згуснат распоред. Во наредните осум до девет дена играме три важни натпревари. Во петок ја пречекуваме екипата на Еурофарм Пелистер 2. Во среда имаме тешко гостување со екипата на Тиквеш во Кавадарци и во недела на домашен терен го пречекуваме актуелниот шампион на Македонија, екипата на Еурофарм Пелистер. Се надевам дека играчите кои се пожалија на повреди изминатиов период ќе се опорават и максимално подготвени, фокусирани ќе влеземе во овие натпревари и заедно ќе се радуваме“. – изјави Андоновски.
Охрид утре ќе има можност да се врати на позитивен резултат и да го започне напорниот мини-циклус со победа.
Средбата со Еурофарм Пелистер 2 ќе се одигра во СРЦ „Билјанини Извори“ со почеток во 18:00 часот, пред домашна публика која секогаш знае да биде нивен ветер во грб.
