Машката и женската сениорска одбојкарска репрезентација на Македонија втора година по ред паралелно ќе настапуваат во Европската лига. Извршниот одбор на Одбојкарската федерација на Македонија донесе одлука да го задржи континуитетот во ова натпреварување, кое од 2026 година ќе добие нова тежина – ќе стане квалификациски циклус за пласман на ЕвроВолеј 2028.
Машкиот национален тим е редовен дел од Европската лига уште од 2014 година, додека женската селекција ќе го има своето трето учество, второ последователно, по дебито во 2023 година.
Пријавите за Европската лига 2026 беа затворени на 1 декември, а ЦЕВ до крајот на годината треба да го претстави новиот систем на натпреварување, најавен на последниот Конгрес во Париз.
Според најавите, пласманот на ЕвроВолеј 2028 ќе се одвива преку Европската лига 2026 и 2027. Четирите најдобри селекции од секое од двете изданија ќе обезбедат директно учество (вкупно осум), заедно со четирите организатори на шампионатот, шампионот од ЕП 2026 и уште 11 репрезентации според ранкингот на ЦЕВ по завршувањето на Европската лига 2027.
