Ракометарите на Тинекс Пролет одиграа едно квалитетно полувреме против шампионот Пелистер, што дополнително ќе ја зголеми самодовербата во тимот во пресрет на новите предизвици.
Викендов (сабота, 17.30 часот) пред Тинекс Пролет е гостување во Радовиш, против тимот кој моментно е последен на табелата во Супер-лигата. Тинекс Пролет имаше шест победи во низа против саботниот ривал, но на последниот меч на домашен терен триумфираше „само“ со 27-24, како јасно предупредување дека овој ривал никако не смее да биде потценет.
„Фаворитската улога не значи ништо ако не ја потврдиме на терен. За нас тоа значи сигурна, контролирана игра од првата минута. Мора да влеземе концентрирано, да не правиме непотребни грешки и да ја држиме иницијативата. Кога си фаворит, сите очекуваат да доминираш – и токму тоа треба да го покажеме преку брз проток на топка, стабилна одбрана и дисциплина во нападот. Целта е да покажеме стабилност и да наметнеме ритам што противникот не може да го следи. Главната сила на Радовиш е борбеноста. Играат до крај, без разлика на резултатот. Имаат квалитетни играчи што ние ги анализиравме добро и се надевам дека ке ги затвориме во одредени ситуации“, вели Томислав Димковски, младиот и суперперспективен бек во редовите на Тинекс Пролет.
Во мак-ракометот е многу потешко да се стигне до цел плен на гостински терен, па јасно е дека не смее да дојде до никакво опуштање во текот на сите 60 минути.
„Победата на гости секогаш бара дополнителна зрелост и концентрација. Прво, мора да го издржиме почетниот притисок – и од противникот, и од публиката. На гости нема простор за опуштање, секоја грешка се плаќа. Затоа најважни се цврста одбрана и паметна организација во напад. Многу значи и карактерот – да останеме смирени, да не реагираме на провокации и да играме свои 60 минути. Нема да биде лесно играат дома ќе бидат мотивирани ,но ние добро се спремавме па се надеваме на позитивен резултат“, оптимист е Димковски.
Средбата меѓу Радовиш и Пролет се игра во СРЦ „25 Мај“ со почеток од 17:30 часот, а судии ќе бидат Димитар Митревски и Благојче Тодоровски од Битола.
